ხელვაჩაურის მერმა პირველივე სხდომაზე თანამშრომლებს უსაყვედურა

ხელვაჩაურის ახალმა მერმა სოფლის რწმუნებულებს პირველივე სამუშაო შეხვედრაზე საყვედური უთხრა. ახალმა მერმა თანამშრომლებს მუშაობა დაუწუნა: “იყო ხარვეზები მუშაობის პროცესში, არ დავიწყებ კონკრეტული ფაქტებზე საუბარს, მაგრამ წინასაარჩევნო შეხვედრებზე მოსახლეობა გვესაუბრებოდა იმაზე, თუ რა ვერ გაკეთდა” – განაცხადა ახალმა მერმა ჯუმბერ ვარდმანიძემ.

ხელვაჩაურის მერი საკადრო ცვლილებებზე ამ ეტაპზე განმარტებებს არ აკეთებს. სოფლის რწმუნებულების კითხვაზე, რა გრაფიკით უნდა იმუშაონ, ახალმა მერმა შესთავაზა დალოდებოდნენ სატელეფონო ზარს.

რაც შეეხება სხვა საკადრო ცვლილებებს, ხელვაჩაურის მერის მოადგილეებს, კანონმდებლობით, უფლებამოსილება შეჩერებული აქვთ.

ვინ დარჩება თანამდებობაზე უცნობია, მუნიციპალიტეტიდან წასვლის შესახებ მკაფიო პოზიცია მხოლოდ გამგებლის ყოფილმა მოადგილემ ნოდარ ხალვაშმა დააფიქსირა. ის თანამდებობას ტოვებს.

წყარო:”აჭარის ტელევიზია”

სხვა ვიდეოები