„ოცნების ქალაქის“ საკითხი აჭარის ბიუჯეტში ისევ ვერ მოხვდა

აჭარის ავტონომიური რესპუბლიკის 2019 წლის რესპუბლიკურ ბიუჯეტში „ოცნების ქალაქის“ საკითხი ასახული არ არის. აჭარის უმაღლესი საბჭოს ჯანმრთელობის დაცვისა და სოციალურ საკითხთა კომიტეტი რეგიონის მთავრობას მოუწოდებდა პრიორიტეტების დოკუმენტში აესახა, თუ რას აპირებდა „ოცნების ქალაქთან“ მიმართებაში. თუმცა მთავრობამ ეს თხოვნა არ გაითვალისწინა.

“ბათუმელები” დაინტერესდა, თუ რატომ არ გაითავლისწინეს „ოცნების ქალაქის“ საკითხი ბიუჯეტში.

“რამდენიმე მიმართულებით განიხილება საკითხის მოგვარება. მათ შორის კერძო ბიზნესის ჩართულობის მხრივაც, ამ ეტაპზე ამიტომ არ აისახა თანხები ბიუჯეტში. მთავრობა უახლოეს პერიოდში წარმოადგენს იმ ინფორმაციას, თუ კონკრეტულად რა სამოქმედო გეგმა არსებობს და ამ სამოქმედო გეგმის შესაბამისად, თუკი აუცილებლობა იქნება ბიუჯეტში იყოს თანხა გათვალისწინებული, გავითვალისწინებთ აუცილებლად,” –  ამბობს არჩილ ვანაძე, აჭარის ფინანსთა და ეკონომიკის მინისტრის მოადგილე.

აჭარის ავტონომიური რესპუბლიკის ბიუჯეტი დღეს, 20 დეკემბერს, დაამტკიცა აჭარის უმაღლესმა საბჭომ. ბიუჯეტის დამტკიცებაში მონაწილეობა არ მიუღიათ ოპოზიციის წარმომადგენლებს. სხდომას  21 დეპუტატიდან 14 დეპუტატი დაესწრო.

2019 წლის აჭარის ბიუჯეტს მხარი მხოლოდ „ქართული ოცნების” 13-მა დეპუტატმა დაუჭირა. დარბაზში იყო, თუმცა კენჭისყრაში მონაწილეობა არ მიუღია დეპუტატ გიორგი ცინცქილაძეს „ბურჯანაძე-დემოკრატებიდან”.

http://batumelebi.netgazeti.ge/

სხვა ვიდეოები